કોને પૂછવો રસ્તો બહારનો -'બાબુલ’

સૂતો રહ્યો એ આમ ક્યારનો
ભુલો પડ્યો સુરજ સવારનો
એક્લો એ જ હતો ગગનમાં
કોને પૂછવો રસ્તો બહારનો

'બાબુલ’

વિસ્ફોટ - 'બાબુલ’

મારી આંખમાં ફૂટી નીકળેલું
સાતમું આકાશ
વાદળ થઇ વરસી પડે
અનરાધાર
ભીંજાયેલા હૃદયમાં થાય શરૂ
વાવણી
લાગણીની
એક
કાચી માટીનું ખોરડું
ઓગળીને થઇ જાય
એકાકાર:
મારું શરીર
અનુભૂતિથી દૂર
જાણે
અજાણ્યા વાતાવરણમાં
પામે વિસ્ફોટ!
શેષ:
ઝરમરિયાં સંવેદનો
ફોરાં ફોરાં

'બાબુલ'
કાવ્ય સંગ્રહ 'અસર' માં થી

બુદ્ધિ - 'બાબુલ’

બુદ્ધિ કંઇ ટોળે નથી વળતી

ટોળામાં બુદ્ધિ નથી મળતી

ના ખણ માથું તું 'બાબુલ'

બુદ્ધિ કંઇ સૌને નથી ફળતી

'બાબુલ’

વિષાદ - 'બાબુલ’

છે વિષાદ

અહીં પણ ત્યાં પણ

ત્યાં

શુષ્ક ધરાના શોષ સમ શોક

ને

ઘેરાયેલા ગમની મુશળધાર હેલી

ઘડી બે ઘડી

...

અહીં

પાનખરના પ્રત્યેક પર્ણ પતનની પીડ

ને

ઢગમાં વરસેલ ગમ

બરફ થઈ થીજે

લાંબી અંધારી રાતમાં

સતત

અવિરત.

'બાબુલ'

કાવ્ય સંગ્રહ 'અસર'માંથી

માર્ગ માણસ લગ નો - ગૌરાંગ ઠાકર

આ નગરને એમ વિકસાવો હવે
માર્ગ માણસ લગ નો બંધાવો હવે
સાંકડા રસ્તા ગલી તો ચાલશે
ઘરમાં ભીંતો મનની તોડાવો હવે

ગૌરાંગ ઠાકર

સાન આવે નહીં ઠેકાણે 'અદમ'

અદમ ટંકારવી એ એક સિદ્ધ શબ્દ શિલ્પી અને નિપુણ શાયર છે. એમની શૈલી સરળતાથી સૂક્ષ્મતમ્ વાત વણી લેવાની ક્ષમતા રાખે છે. .. એ કહે છે...

શબ્દમાં શંખ જેવું વાગે છે
અર્થના દેવા તો ક્યાં જાગે છે
સાન આવે નહીં ઠેકાણે 'અદમ'
ઠોકરો તો અનેક વાગે છે


અદમ ટંકારવી

જંગલ રાજ- 'બાબુલ’

એક હાથી જો શરાબી થશે
ખૂબ ખાના ખરાબી થશે
થઈ જશે જંગલ રાજ
વાંદરા ય નવાબી થશે
થશે ચકલીઓ કાબર
ને કાગડા ગુલાબી થશે
ઉંટિયા લેશે રાસડા
ને ગીધડા શબાબી થશે
વાઘ સિંહ શિયાળવા
તો મોરલા નકાબી થશે
અમથા આ કીડીબાઇ
પણ હાજર જવાબી થશે
માખ પડી બાટલીમા
'બાબુલ' બૌ ખરાબી થશે

'બાબુલ’