બંદી - 'બાબુલ’

હોઈશ હું ભયંકર ગુનેગાર

એથી

બંદી બનાવાઈને પુરાવાઈ ગયો છું

મારામાં જ

હું

માંલીપાના અંધકારથી છળી ઉઠું છું

યુગો સુધી

સળવળાટ કરતાં સાપોલિયાં સાથે

રમતાં રમતાં

કંટાળી જાઉં છું

અંતે

મારી સાથે મારામાં જ કેદ થઇ ગયેલી

એવી કોઈ એક ક્ષણ

ખણખણાટ કરતી

આવીને વળગી પડે છે મને

પણ

બંદીઓને આલિંગવાની ક્યાં છૂટ હોય છે?

એથી

ચોમેરથી ધસી આવતા કોલાહલના ટોળાં

બંદીગૃહમાં પ્રવેશે

એ પહેલાં

ફરી બેડીઓમાં પરોવી દઉં છું

હું મારી જાત

'બાબુલ’

કાવ્ય સંગ્રહ 'અસર' માંથી