શનિવાર, 9 ડિસેમ્બર, 2023

આપણે - બાબુલ


ક્યાંક લોકો મરે છે આપણે ચુપ રહો 

દુનિયા જોયા કરે છે આપણે ચુપ રહો 

આભ આખું લગાવે આગ ચોગમ અહીં

 ખાક પાણી ભરે છે આપણે ચુપ રહો

ભૂખ તો ક્યાં ય ખોવાઇ બચપણ જેમ અહીં

છોકરાં કરગરે છે આપણે ચુપ રહો

ગામ છોડી થવાના બાપડા હિજરતી

જીવ સૌ નો ડરે છે આપણે ચુપ રહો 

હાયકારા ચિત્કારો વંચિતો દફન છો

માત રોયા કરે છે આપણે ચુપ રહો

દેહ ખંડેર છે, માંહ્યલો ય મૃત બાબુલ

શાંતિ ખોયા કરે છે આપણે ચુપ રહો


બુધવાર, 14 ડિસેમ્બર, 2022

ઉદ્વેગ - બાબુલ

 ઉદ્વેગ 


ઉદ્વેગઃ

રાખ ઢાંકેલ

બુઝાયેલ અંગાર 

સ્હેજ હવાથી ભભૂકે

પ્રજ્વલિત 

અગન દાહ 

લપેટે મન -વિચારશૂન્યતા

સળગે મનન

વિટંબણાવિમાસણ

શૂન્ય સંવેદન

બુઠ્ઠાં વર્તન 

બધિર નયન 

અસહ્ય!

યાર 

આગ  ઠાર

અને

નિકાળ સૌ અંગાર 


બાબુલ ૧૪ ૧૨ ૨૨

શુક્રવાર, 24 જૂન, 2022

હથેળી - બાબુલ


હથેળી

રેખાઓના અકસ્માતથી

ઓચિંતી ખરડાય 

લોહીલુહાણ

થાય,

આંગળીઓ

લૂંછી લે જેટલું

લૂંછાય


લીટીઓ સમ

સઘળું કૈં દોડે 

બદલવા દિશા 

દશા અમળાય


ભાગંભાગ-

ત્રાગાં માંગા સૌને ભાગ

ભાગ્ય મુઠ્ઠીભર સમજાયઃ


 

હથેળી

હાથતાળી દઈ જાય


બાબુલ ૨૪.૬.૨૨




શનિવાર, 1 જાન્યુઆરી, 2022

Wee wish - Babul

This year too

will be confined to history

Savoury memories that can be cherished

And sickening shocks of all things that perished

Still

I see here,

eager to walk in glory 

another new year

Hope still safe 

that breaths new health, peace and joy- I hear

A wee wish for a happy new year!


31 12 2021

શનિવાર, 21 ઑગસ્ટ, 2021

છૂટા પડવાની વેળા - બાબુલ

 છેવટે 

આવીને વળગે છે

એ એવી:  વિહવળ

કરી દે સામટા ગળગળા

છૂટા પડવાની વેળા


નૈન અગનગોળો

જેમ

ડૂબતા સૂરજનાં છેલ્લાં ડૂસકાં

લોપાઇ જાય

આકાશની વિશાળ છાતીમાં

ને

ઓઢી લે 

એ પણ પછી

અંધારું- ઢાંક પિછોડો.


ટમટમે દરદ ઠેર ઠેર

તારા વગર

રાત થતી હશે?

જતી હશે?

... હાય!

છૂટા પડવાની ઘડી

ઘડીભર છૂટતી નથી

કાળજે ચોંટેલી

પણ કાળજું લુંટતી નથી


ક્યાંક નિર્જળ

કયાંક સજળ

કરતી રહે છે વિહવળ

રે, મીત વિનાના મેળા

છૂટા પડવાની વેળા.


બાબુલ


રવિવાર, 4 એપ્રિલ, 2021

સબર - બાબુલ

સબર


યાર દોસ્તીની ખબર કર
પ્રેમ જેવી તું અસર કર

ખોલ ધોળા આવરણને
કોરી ધાકોર નજર કર

રંગ પામ્યા છે અંત બસ
એમને ખાતર કબર કર

ના કર માતમ ગમ ન સિતમ
સાંભળ: સંભાળ, સબર કર

અંત છે આરંભ  'બાબુલ'
તું એક ઈશ અકબર કર.

બાબુલ:

એક સ્વજન, જ. ખલીલ ધનતજવી ના દેહાંત (ઇન્તેકાલ)ના સમાચાર પર:

અવસાન પ્રસંગ:  આ સંસારમાંથી આખરી વિદાય - સફેદ કફન, અંતિમ દર્શન, શ્વેત પરિધાન ( રંગ અંત); રુદન- આક્રંદ વચ્ચે ઉભરતી ફિલસૂફ  સલાહ, સૂચન: ધૈર્ય, સમજદારી અને શ્રધ્ધા- આસ્થા.  મક્તા ( અંતિમ શેર) - મત્લા (પ્રથમ શેર- આરંભ)નો મહિમા કરે છે:  આવે ટાણે પ્રેમ -દોસ્તી થકી શાતા પ્રસરાવીએ. 
પ્રાર્થના (દુઆ) કે એમના મૃતાત્મા (રુહ)ને વૈકુંઠ (જન્નત) પ્રાપ્ત (નસીબ) થાય.  

શનિવાર, 27 માર્ચ, 2021

Lockdown ન પ્રાસ ન કવિતા: બાબુલ

 ન આવે

કવિતા કોઇ 

ન ગઝલ

નહિ કોઇ છંદ, લય કે પ્રાસ


છું મુગ્ધ હું  

એ હવામાં

જે વિંટળાય છે તને

અને

પસવારે તારા હ્રદયને

ઉતરી છાતીમાં લઇ શ્વાસ


આમળી અનામિકા પર

તારી અલકલટને

જોયાં કરું

ગાલ પર ઉભરતાં

શેહનાં

રતુંબડાં રેખાચિત્રો


અચાનક છોડી દઉં

બંધ કેશ ને

અષાઢી વાદળિયા ઝુલ્ફો

રેશમી પીઠ પસવારે - ત્યારે

પાંપણ ઝૂકી જાય

હોઠ મોઘમ મલકી જાય


બસ  આવે છે આ સપનાં

અહર્નિશ

વણછીપી આશ

ન  આવે ગીત કોઇ ન ગઝલ

ન તો રદીફ, ન પ્રાસ.


બાબુલ

૧૩ માર્ચ ૨૧

આપણે - બાબુલ

ક્યાંક લોકો મરે છે આપણે ચુપ રહો  દુનિયા જોયા કરે છે આપણે ચુપ રહો  આભ આખું લગાવે આગ ચોગમ અહીં  ખાક પાણી ભરે છે આપણે ચુપ રહો ભૂખ તો ક્યાં ય ખો...