નહિ મોન્તા -બાબુલ

નહિ મોન્તા 

વરી ,

અમોં કો...ય  સોં ન્તા મોં 

...

શ  અમાર તો 

ગોમ મોં જ શોં ન્તા

ન  પૂરતી શ 

ભલ ન શૉમરી ન પાતરી 

...

અમોનં  વિલાયતી  દેવતૉની 

કોય  જરૂર નહિ 

અન  નઇ જરૂર ઇના થેલાની ક 

ઇયાંની શોકલેટ, ગોરીઓની 

મફરી , બોરાં , ટેભરોં 

ફોંટમોં બૉંઘી ન રોજ ભરી લાવ શ 

અમોરી શોં ન્તા

તો 

વરહ ના વસલા  દા  ડ 

સોં ન્તા ની લાય મોં

હું કોંમ ઉપાડો લઇ બેઠા સો  લ્યા 

ક યું  ના ?

ક  

નહિ મોન્તા

અમં  કો...ય  સોં ન્તા મોં 

બાબુલ 

25 ડિસે. 2020

લુંટાયેલી કવિતા- બાબુલ

લુંટાયેલી

એક કવિતા

જેની ચીરહરણની ચિચિયારીઓથી 

ચકલીઓની ઉડાઉડનો ફફડાટ

અસ્તાચળના આખરી પ્રકાશમાં 

ક્યારનો આથમી ચૂક્યો હતો

એની

પિંખાયેલી કડીઓ, ચૂંથાયેલી 

દેહલતા મેલી

તૂટેલા મણકા: 

વેધાયેલી જિહ્વા

પર

મૂંગી વેદનાનું લોહી ગંઠાઇ ગયું હતું  

સીમની પેલે પાર

...

... પાદરે જામેલી મહેફિલમાં

અલંકૃત ગઝલના 

ચૂંટાયેલા શેર

વાહવાઇના મદમાં દોહરાતા રહ્યા

કંઠસ્થ થતા ગયા.

...

કાગળ સમેત સળગી ચૂકેલી 

એ કવિતાની ભસ્મ

અલોપ થઇ ચૂકી છે

ને કોઇ સભામાં 

એની નોંધ પણ લેવાતી નથી

...

બાકી કવિતાઓ  હજી ગવાયા કરે છે

ઘવાયા કરે છે...

બાબુલ

પીળા પત્રો - બાબુલ

 ફરી

એ જ પીળા પત્રો

જુની શ્યાહી, પણ

લીલી છમ્મ!

મોસમના

સતત બદલાતાં સત્રો

કોઈક  ધરડા પાન ઉપર

નસેનસ સંકોરી કોતર્યા કરે છે

સંદેશો

ઓતરાદી વાયરાના

ટાઢુકા વાયદામાં

એ પાન-

ઝૂલશે

ભૂલશે એ ભાન,

તૂટશે

ખૂટશે એ ડાળ પર

એ અંદેશો.

પછી

ખુલ્લાં એવાં ઝાડ

વચાળે 

ઊડાઊડ કરશે 

પીળા પત્રો

વગડે ખાલી ખમ્મ.

(એ)મને 

વાંચી શકાય તો 

વાંચો, મિત્રો.

બાબુલ

5 સપ્ટેમ્બર  20

બુકાની - બાબુલ

 બુકાની

તું
રહે ખામોશ
યા વદે
પ્રત્યેક શ્વાસે ઉભરે છે
જે કંપારી
તારી
નવલી બુકાનીમાં
એ
અજબ અહેસાસ
જગાવે છે
મારાં મનમાં

---×--

સૌ
કહે છે
એ ગાળે છે
ચાળે છે, હવા
માન્યું!
કે ખાળે છે વ્યથા
કિન્તુ
બાળે છે દિલ
તારાં સુર્ખીલાં અધર આવરતી
બુકાની

--×--

નથી
પિછાની શકતો
એ
પ્રેમ છે કે ઘાત
ને આમ તો
છે એ
મારી જ જાત
બાંધી છે જેણે
જડબેસલાક
રુપાળી બુકાની.


બાબુલ
15 ઑગષ્ટ 2020

હેવાયો - બાબુલ

હેવાયો - બાબુલ

હું  એમનો હેવાયો છું
છું એકલો ટેવાયો છું
જો ભાવતું સપનું આવે
બંધ આંખે દેખાયો છું
રોજ સહું હું જ સૂરજ
તું પાડ તો પડછાયો છું
છે ઝળહળ હજી મારામાં
છો અંધારે ઘેરાયો છું
ના સાંકળો બેડીઓથી
તુજ પ્રેમથી બંધાયો છું
છું આમ તો પુરબહાર પણ
જાતે ખુદમાં પૂરાયો છું
'બાબુલ' પ્રસરવાનો બધે
હજી ક્યાં કશે ફેલાયો છું?


બાબુલ
23 એપ્રિલ 2020

એકલા છો : બાબુલ

એકલા છો : બાબુલ

ગામ આખા મહીં એકલા છો 

પૂરતાં છો ભલે એકલા છો 

જંગ જીતે ઘણાં એકલવીર 

હાર માની ન લો એકલા છો 

શાંત કોલાહલ થઈ જવાનો 

શેર બીજા નથી, એકલા છો 

આવવાનાં  તમે કે હું આવું 

હું અહીં આપ ત્યાં એકલા છો 

આંખ ક્યારે બિડાઈ શી ખબર 

દ્ર્શ્યની ઓ પાર એકલા છો 

શ્વાસ છોડી જવાનાં બધાંનાં 

પ્રાણવાયુ કહે એકલા છો?

'બાબુલ' હવે મળે ન મળે 

છે દિવ્ય સાથ ક્યાં એકલા છો 

બાબુલ 

26 નવેમ્બર 19

27 માર્ચ 20

આંકડો --- બાબુલ

આંકડો


એમણે ઘોષણા કરી
એક અન્ય બીમાર વૃધ્ધનું પાછલી રાત્રે મૃત્યુ થયું છે
આમ તો મારે ઝાઝી ફરિયાદ નથી
કિન્તુ
આ સૌ ઠંડાગાર આંકડાંમાંનો એક બીજો આંકડો?
ઘડપણની સાવ  નિર્મૂલ્ય અવહેલના? 
નિસ્પૃહા:
એ આત્માએ વરસો સહેલી
દર્દોની અગણિત પીડાઓ
- પરંતુ
ધબકતા હાર્દનું બંધ થવું
એટલે બીજી કેટલીય શક્યતાઓનો જન્મ
ઉપકરણો, ઈલાજ
...
કોઈ જિંદગીનો ભરોસો નથી
છતાં
એ હજુ એ કહ્યે જાય છે
એક વૃદ્ધ માત્રનું મૃત્યુ થયું છે.

બાબુલ