ભય- બાબુલ

ઉંચાઈનો ભય લાગે છે

ઉંડાઈનો ભય લાગે છે
આંબીને શિખરને અંતે

આ ખાઈ નો ભય લાગે છે

અરે વાત શું કરું દોસ્તો

કે  ભાઈનો ભય લાગે છે

જીત્યા તો  સિકંદર હા રે
કાં રાઈનો ભય લાગે છે
બાહુપાસમાં ન લો જાનું
જુદાઈનો ભય લાગે છે
શું માપથી મળશે જમીન
લંબાઈનો ભય લાગે છે



 બાબુલ

અભિમન્યુ - બાબુલ

અભિમન્યુ

અર્ધ સૈકે

સપ્ત કોઠા  સુપ્ત

જગાવ્યા જૈફે

રહસ્ય સર્વ ગુપ્ત

દૃષ્ટિ શિથીલ

શિથીલ તમામ ગાત્ર

રુધિર ઉત્ચ્છ્લ ગતિશીલ

શેષ શ્વાસ માત્ર

બાબુલ 

સજા - બાબુલ

દઇ દ્યો

સો સાટકાની સજા

કેમ કવિએ કવિતામાં

પૂર્યા

પાંચ પચીસ પતંગિયા

યા

પહેરાવી પોપટને પારેવાની પાંખ

કેમ

ચાંદલિયાને ચગાવ્યો

ચોરી ચકલીની ચાંચ

એમ તો એમ
પ્રગટાવ્યા પુરબહાર પ્રેમ
પહેલા પગરવના પૂજન
પછી રંગ્યા રૂદિયાની રગમાં રુદન
ને 

નદીને નીચોવી નિર્મમ

સાવ સૂકવી સખી
વેરી વહેણે વરણાગી વર્ણન
લાલ લોહીમાં  લ્હ્યાય લખી  

રે 

ખંજરથી ખોતર્યા ખંજન

નિતાર્યા નયન નવોઢા શા

આંજી અધર ઓગાળ્યા અંજન
તો ય શબ્દ શુરા  શરમાય ના

...કેટલા કર્યાં કુકર્મો કાવ્યમાં

કહે કાગળ કલમ

સો દ્યો સજા

બાબુલ 

વિકરાળ -બાબુલ

ચીંથરેહાલ અહં 

ડૂબાડું ખુદ- સ્વયં 

લય લઇને વહું કહું 

રગે રંગ ભરું મરું

મન વન વિકરાળ વરુ 

બાળ તું , હું ભાળ કરું 

બાબુલ 

શું થાત - બાબુલ

નિરાંત શોધું છું
હું જાત શોધું છું
ન  હોત જો  બાબુલ
શું થાત શોધું છું

બાબુલ

ઈદ - બાબુલ

ઈદ મુબારક 

કોઇ દિ દુખડા કોઇ દિ મોજ

રોજ રોજ રોજા ઈદ ય રોજ

તારણ એક એ તારણહારો જ

ખુદમાં ખુદ તું ખુદાને ખોજ 

બાબુલ 

ડીજીટલ દુઆ -બાબુલ

ડીજીટલ દુઆ 

પ્રભુ

સકલ વિશ્વના સર્વર પર

જિંદગીના લેખાજોખા ચાતરતું 

 મારું અકાઉન્ટ પણ ક્યાંક હશે 

ચાહું તો છું કે એ ખાતે

યુઝરનેઈમ ને પાસવર્ડ મળે

કિન્તુ

જાણું છું કે એ પ્રોટોકોલ નથી 

એથી

એટલી અરજ રજુ કરું 

કે

મારા ખાતાના તમામ સ્ખલનો ને

ડીલીટ કરી દ્યો 

પ્રભો 

સ્તુતિ અર્ચન દુઆ હવે

કરું છું સતત લોગ 

ને વર્ચ્યુઅલ પ્રાર્થના થકી

રાખું છું તારું સ્મરણ અલાઈવ 

તારા જ કોઈ એક વાદળમાં

સિક્યોર મારા અકાઉન્ટને 

બક્ષી દો

પ્રભો.

બાબુલ 

વેટિકન, જુલાઈ ૨૦૧૧