ઉકરડાં - બાબુલ

અટવાયા પડઘા અડધા પડધા
થોકબંધ નાડી ઝાંખા પડદા
ધોધમાર વાણી અંગે ઉઝરડાં
વળતા પાણી તરતાં  ઉકરડાં

બાબુલ 

લોહી - બાબુલ

સોજી ચૂકેલું લોહી
ના સહી શક્યું  ના રહી શક્યું
પોલાં  છિદ્રોને નિર્મોહી
નિશબ્દ દર્દ  ના કહી શક્યું

મૂળ તો મૂઢ છે વલોપાત
ને  ઉપર હડહડતા સ્મિત
પ્રસરે અફીણી આઘાત
વળી કણેકણ ધૂણતા પલિત

ગમગીન બીના: છે ઘાયલ યકીન
ઘાવથી ઉભરતા સિતમ ધોઈ લે
દે દૃષ્ટિને ટેકો: લગાવ દૂરબીન
પીડા છે અંગત -જોઈ લે 

ફરી સ્વસ્થ ફરી સશક્ત
રગેરગ ફરશે નવું રક્ત


બાબુલ
6 ડિસેમ્બર 14

ધર્મઋણ - બાબુલ

યદિ
હોય ધર્મ  
અખંડ અંડાણુંનો
તો છે અંગીકાર:
હોય સંપ્રદાય  
સહસ્ર શુક્રાણુંઓનો
તો છે સમર્પણ:
આ જ ધર્મજન્ય
ગર્ભબિંદુની નિર્દોષતા
માનસમાં જીવંત હોય..
એ ધર્મ    




બાબુલ 

શબ્દ-બાબુલ

સ્પર્શ શબ્દ શ્વાસ શબ્દ, શબ્દ શબ્દ સ્વાદ
અર્શ શબ્દ આશ શબ્દ, આ જ શબ્દ સંવાદ
હર્ષ શબ્દ હાશ શબ્દ, શબ્દે શબ્દ દાદ
વર્ષ શબ્દ સુવાસ શબ્દ શબ્દથી વિવાદ
બાબુલ 

રોમાંચ - બાબુલ

રોમાંચ...
સાંજ ઢળી ફરી
ફરી ક્ષિતિજો સળવળી
નાગણ લટ લપસણા ભાલ
શ્વાસ શ્વાસ ઉષ્મા
સુરભિથી મહેંકતા ગાલ
રોમ રોમ તરવરતી તૃષ્ણા
અધીરાં  અધર
કંઈજ કારણ વગર
ચૂમી ત્વરિત ક્યાંક  
ક્યાંક સઘન ચુંબનનો  માદક વળાંક
સ્પર્શ- વિદ્યુતી, અફાટ આકાશ
વિસ્તરે તત્પર બાહુપાશ
ત્વચા ત્વચા,છાતી છાતી
હથેળીઓ અમળાતી
રાતી રાતી
કીકીઓ ઉછળતી મદમાતી
છલોછલ નાભિ: મીઠી વેદના
અદભૂત ચેતના
Romance

બાબુલ 

તેજલિસોટા -બાબુલ

હું અગણ્ય તારાઓને
ધીમેથી
મારી બાથમાં ભરી લઉં પછી
તું  આવી જજે.
ચંદ્રને આમ ટીંગાડીશું
ધ્રુવને તેમ
સપ્તર્ષિ અહીં
શુક્ર ત્યાં
બુધ પેલા ખૂણામાં
બસ
ઝાકઝમાળ થઇ જાય બધું
પછી તું તારે ચાલી જજે.
હું
નિત્ય તારાં સ્મરણોમાં
નાહતો રહીશ
તરબોળ તારા ઉજાસમાં
જોયા કરીશ
આ ટીંગાડેલા તારાઓને।
તને ચાહ્યા કરીશ।...
અને એમ જ વિતાવી દઈશ યુગો
વિરહમાં
તારી પ્રશસ્તિ કર્યા કરીશ
છેવટે
ખરી પડશે તારાઓ
એક એક
એમ અસંખ્ય તેજલિસોટા પર.
હું
ધીમેથી સરકી જઈશ
ફરી પાછો
તારાં  સ્મરણો સમીપ।

બાબુલ 
કાવ્યસંગ્રહ અસર માંથી
(ગુર્જર  ISBN 81-89166-31-X )

વિષાદ - બાબુલ

છે વિષાદ
અહીં પણ ત્યાં પણ

ત્યાં
શુષ્ક ધરાના શોષ સમ શોક
ને ઘેરાયેલ ગમની
મુશળધાર હેલી
ઘડી... બે ઘડી

અહીં
પાનખરના પ્રત્યેક પર્ણ પતનની પીડ
ને ઢગમાં વરસેલ ગમ
બરફ થઈ થીજે
લાંબી અંધાર રાતમાં
સતત... અવિરત

છે વિષાદ
અહીં પણ ત્યાં પણ

બાબુલ
કાવ્ય સંગ્રહ 'અસર' માંથી