રવિવાર, 6 ડિસેમ્બર, 2015

એક નાનકડી કીડી - બાબુલ

તોફાની વરસાદ
અને એક નાનકડી કીડી

અચાનક આરંભાયેલા તાંડવમાં
ખોવાયેલી કીડીના
લીલાંછમ પગલાં
ઘરડા ઓકનાં પીળચટ્ટા  પાન પર
તરતાં તરતાં નદીએ પહોંચ્યા

કીડી વિહોણાં પગલાંથી
ઉશ્કેરાયેલી બ્હાવરી નદી
ઘરેલું વહેણ-
કિનારા છોડી
કીડી શોધવા દોડી

પ્રવેશ્યા જો  પાણી
શણગારાયેલી બારીઓમાં
પછી બુઝી  રોશની:
કોઈક વાસી  છાપું - કીડીનો તરાપો
સમાચાર: હવા ભરેલી હોડી

હાલક ડોલક વાડી ફળિયા
ડૂબું  ડૂબું શેરી બજાર
ને બાર ગાઉ અંધાર 
ઉપર પાણી કાળું
છાપ્યું એક મથાળું

તોફાની વરસાદ
અને એક નાનકડી કીડી

બાબુલ 












સોમવાર, 9 નવેમ્બર, 2015

દિવાળી - બાબુલ

આ વરસ જો સપનું ફળે

દરેક જણમાં માણસ મળે

દિવાળીની થાય બંદગી

ઇદના રોજ દીવા બળે

'બાબુલ’

શનિવાર, 5 સપ્ટેમ્બર, 2015

મૃત શૈશવને - બાબુલ

મૃત શૈશવને* 

નિર્દોષ  આયુ
વંચિત પ્રાણવાયુ
નાની બે હથેળી ઉઠાવી ને બાળ
કહેતું હશે શું - મને સંભાળ

ન કિલ્લા, ન પગલીઓ  રેત બસ રેત
કિનારે ઢગલીઓમાં રહેત બસ હેત 
દરિયો પસવારે નિશ્ચેત ગાલને
કદાચ ઝંખે જીવંત ગઈકાલને

એક ડૂસકું  ડૂબ્યું મધ્યે
મૂંગા મ્હોં  રક્તપાત પ્રત્યે
સાગર થયો વધુ ખારો
આંસુ એક ખર્યું કે તિખારો 

થશે ઈદ - યોમ કીપુર -દીપાવલી- નાતાલ
હાલ તો જાણે ખૂટતા શ્વાસનો સવાલ

બાબુલ
05.09.15

* તૂર્કીના દરિયાકાંઠે ચિર નિંદ્રામાં પોઢેલા શરણાર્થી શિશુને અંજલિ

શનિવાર, 2 મે, 2015

ઉકરડાં - બાબુલ

અટવાયા પડઘા અડધા પડધા
થોકબંધ નાડી ઝાંખા પડદા
ધોધમાર વાણી અંગે ઉઝરડાં
વળતા પાણી તરતાં  ઉકરડાં

બાબુલ 

રવિવાર, 8 માર્ચ, 2015

લોહી - બાબુલ

સોજી ચૂકેલું લોહી
ના સહી શક્યું  ના રહી શક્યું
પોલાં  છિદ્રોને નિર્મોહી
નિશબ્દ દર્દ  ના કહી શક્યું

મૂળ તો મૂઢ છે વલોપાત
ને  ઉપર હડહડતા સ્મિત
પ્રસરે અફીણી આઘાત
વળી કણેકણ ધૂણતા પલિત

ગમગીન બીના: છે ઘાયલ યકીન
ઘાવથી ઉભરતા સિતમ ધોઈ લે
દે દૃષ્ટિને ટેકો: લગાવ દૂરબીન
પીડા છે અંગત -જોઈ લે 

ફરી સ્વસ્થ ફરી સશક્ત
રગેરગ ફરશે નવું રક્ત


બાબુલ
6 ડિસેમ્બર 14

શનિવાર, 28 ફેબ્રુઆરી, 2015

ધર્મઋણ - બાબુલ

યદિ
હોય ધર્મ  
અખંડ અંડાણુંનો
તો છે અંગીકાર:
હોય સંપ્રદાય  
સહસ્ર શુક્રાણુંઓનો
તો છે સમર્પણ:
આ જ ધર્મજન્ય
ગર્ભબિંદુની નિર્દોષતા
માનસમાં જીવંત હોય..
એ ધર્મ    




બાબુલ 

આપણે - બાબુલ

ક્યાંક લોકો મરે છે આપણે ચુપ રહો  દુનિયા જોયા કરે છે આપણે ચુપ રહો  આભ આખું લગાવે આગ ચોગમ અહીં  ખાક પાણી ભરે છે આપણે ચુપ રહો ભૂખ તો ક્યાં ય ખો...